Os Inuit, de Alaska a Groenlandia

 

Cos Nativos no Río Yukon, Fort Yukon, Alaska ©pemónbouzas

Coñécense como  Inuit os pobos que habitan o Ártico. Inuit significa persoas, xente, e agrupan numerosas nacións, primeiras nacións, pobos primixenios, que viven dende Alaska ata Groenlandia pasando, entre medias, polos Territorios do Norte  de Canadá. Groenlandia aparece nas últimas semanas con moita frecuencia nas páxinas dos xornais de todo o mundo grazas ás ansias imperialistas de Donald Trump, quen quere anexionar a illa. Hai poucas xornadas celebraron eleccións, gañadas por primeira vez por un partido independentista moderado, Groenlandia forma parte do Reino de Dinamarca.

A “Terra verde”, ese é o nome que lle puxo Erik o Vermello cando chegou alí para convencer mais colonos viquingos, está maioritariamente poboada por Inuit. Os seus habitantes sentíronse sempre inferiores, véndose obrigados a renunciar a moitas das súas tradicións e costumes por seren consideradas pecaminosas por parte dos misioneiros europeos, luteranos, brancos. Agora, son as mulleres as que están a recuperar algunhas desas costumes, como a de tatuárense como sinal de identidade.

Os Inuit viven en territorios de climas extremos e dependen da natureza para subsistir. As súas crenzas e deidades están relacionadas co mar, nos pobos costeiros, coa terra e co firmamento, aí entran as auroras boreais ou luces do norte, como eles lles chaman, que representan os espíritos dos que xa marcharon. Aliméntanse polo tanto da pesca e da caza de mamíferos mariños, da caza de caribús e doutros cérvidos, do secado de peixes e carnes ao sol para conservalos de cara o inverno, alimentos cos que fan sopas e guisos, ou que comen afumados.

Son xente amigable coa que compartín experiencias, comida e tempo, cando tiven oportunidade, tanto en Alaska como no norte de Canadá. Eles ensináronme a afumar o salmón e a carne ao seu xeito.