Xa están aquí!!!

 

Na miña cova, aínda optimista. ©pemonbouzas 

A velas vir. Así é como comeza este ano 2025. Uns, poucos, observando; o resto do mundo a velas vir, decatándose do que chega cando xa o teñen enriba. Hai uns trinta anos, un enxeñeiro informático especializado en intelixencia artificial dixo unha frase que, daquela,  me desconcertou: “O mundo, tal como o coñecemos, está en mans de intelectuais con ampla formación e de científicos de primeiro nivel que son quen de asesorar os líderes políticos que buscan o mellor para a sociedade. Iso vai cambiar, en poucas décadas o mundo vai estar en mans de informáticos altamente cualificados no seu campo e ignorantes do mundo que lles rodea, xa que para eles so contan os protagonistas dos videoxogos e os súper heroes da ‘cultura’ norteamericana”.

Xa están aquí!!!  A prensa recolle hoxe o paso atrás, a recuada, de META e do seu propietario Mark Zuckerberg no tocante á moderación de contidos falsos en Instagram e Facebook. Isto é unha claudicación total e un medo absoluto ao que está a piques de empezar: a era Trump movéndose cal marioneta en mans do que si que gaña, Elon Musk.

Debemos abandonar Instagram e Facebook como fixemos con X (Twitter)? Quizais abandonar X (Twitter) fora como negarse a mercar un Tesla para non seguir enriquecendo a un tipo tan negativo para a sociedade. Quizais haxa que loitar dende dentro, dende Facebook e Instagram contra as trolas, as mentiras, as noticias falsas co fin de intoxicar e facer crer que os demócratas do mundo son seres atroces, con rabo e cornos que devoran nenos. Quizais...

Pero quedan outros lugares, certamente menos concorridos, para podermos expresar con certa liberdade (veremos o que duran) como os blogs, páxinas web, podcast... Namentres, loitemos contra o mal e os malos fomentando os valores democráticos sen esquecer poñer as barbas a remollo...