Queremos GALEGO!!!

 

©queremosgalego.com

O vindeiro 17 de novembro está convocada unha manifestación en Santiago de Compostela en defensa do noso idioma, o galego convocada pola plataforma “Queremos Galego” que acolle máis de 600 colectivos sociais. Tras a recente publicación dos datos do Instituto Galego de Estatística, a alarma é vermella. Redución das materias en galego no ensino primario e secundario con nenos de máis de cinco anos que descoñecen completamente o seu idioma materno, con desaparición do galego  nas mensaxes oficiais en hospitais e centros ambulatorios e cun desdén absoluto por amplos sectores sociais, acomodados nun suposto elitismo identificado coas grandes cidades, son síntomas altamente preocupantes como para pensar e actuar a prol do noso idioma.

Porén, a Televisión de Galicia ven facendo, dende finais dos anos noventa do século pasado, batidas autorizadas de aniquilación do Xabarín Club co que as nenas e os nenos perderon o seu referente na televisión pública galega. Daquela, os máis novos falaban galego, cantaban en galego, dende cancións tradicionais ata as dos grupos de rock máis consolidados da nosa música, xogaban e rían en galego. Hoxe, ao seren abandonados polos que tiñan que protexer o Xabarín, a xente nova abandonou tamén a TVG; de feito, o televisor de última xeración que hai nas casas é so un moble máis que so empregan os maiores. Segundo din, a nova lei de medios públicos que están preparando dende a Xunta vai permitir o emprego do castelán na radio e televisión públicas, algo que xa é bastante frecuente en programas, incluído Luar, co pretexto de que entrevistan a artistas ou personaxes forasteiros. Iso era excepcional hai anos.

Defendamos o galego e defendamos os medios públicos galegos.