.jpg)
“El Bosque” chegou a min cando era un rapaz,
e impactoume. Ata entón lía ficción, pero este agasallo dunha boa persoa,
maior, forasteira, que me convidara a facer piragüismo con el nunha embarcación
de dúas prazas, pola ría de Arousa, actividade que repetín varios anos no mes
de setembro, con pouco veraneante, ata que aquel home deixou de vir a Galicia,
pasou a formar parte de min e das miñas lecturas.
O caso é que “El Bosque” é un libro
editado pola revista Life en 1964 en inglés e en 1966 en castelán. Tanto a
textura da capa, impreso en tecido, como as fotografías interiores, moitas delas
realizadas en 1904, chamaron a miña atención, e a súa lectura como a observación
das fotos representaron un novo meneo á miña querenza pola natureza, tal como
me estaban educando na casa.
A segunda fotografía desta recensión foi
feita en 1904 polos fotógrafos do Servizo Forestal dos EEUU. Impresionoume ver
86 persoas ao pe dunha sequoia pouco despois de que un leñador, un tal Boole,
conseguira que a compañía madeireira indultara de ser cortada a sequoia que,
daquela, xa debía medir preto de 20 metros de circunferencia, e uns setenta
metros de altura. Hoxe en día, a sequoia de Boole (que así se chama) mide máis de oitenta metros de altura, anda
polos 25 m de perímetro, sendo a sexta máis alta dos EEUU. Os botánicos
calculan que debe ter uns 2000 anos de idade. A sequoia de Boole forma parte do
Monumento Nacional de Sequoias Xigantes do Parque Nacional das Sequoias de
California, a catro horas en coche ao
norte de Los Ángeles.
Gardo este libro nun lugar ben visible e
vou a el con certa frecuencia. Algo se axita no meu interior cada vez que lle boto
unha ollada a textos e, sobre todo, ás fotografías. E sempre me lembro daquel
home, amigo dos meus pais, que me falaba de libros, de natureza, de deporte, namentres
facíamos amplos traxectos na piragua.
Comentarios
Publicar un comentario