Efecto laranxa. Temporada 2
 |
| Efecto laranxa. Temporada 2 |
Queda ata o 20 de xaneiro para ir tomando
as precaucións necesarias para protexerse do comezo da segunda temporada do
efecto laranxa. O que ven, canda menos catro anos, foi retratado xa por Joseph
Conrad cando o seu Charlie Marlow se internou polo río Congo na procura de si
mesmo e ao atopar a Kurtz e todo o que o rodeaba berrou para si mesmo: O
horror!! O horror!. Chegara ao corazón da escuridade (magnifica tradución ao
galego de Manuel Outeiriño en edicións Positivas). Un horror laranxa ven de
camiño grazas a unha das calidades máis recorrentes da humanidade: a súa
infinita estupidez.
Mais esa estupidez que apoiou o monstro
laranxa acadou a maioría nese tan peculiar e tan cuestionable, dende o punto de
vista democrático, sistema electoral dos EEUU nas presidenciais. Mais gañou. So
hai que achantar e prepararse. Lin hoxe un artigo que falaba de que Trump
regresaba e ía, primeiro desquitarse e, segundo, vingarse. Non teño dúbida de que será así, tanto dentro
como fora dos EEUU.
Efecto laranxa, temporada 2. Vai ser a
segunda lexislatura de Trump. Nos EEUU so se pode ser presidente en dúas
lexislaturas. Na Casa Branca houbo xenocidas de indios, tratantes de escravos, militares altamente
belicistas, fillos de contrabandistas de alcohol, ignorantes, actores de
segunda, magnates do petróleo, algúns deles intelixentes, seguro. Agora vai
chegar por segunda vez un tolo, un inculto, un machista, un racista, un
arroutado, unha persoa á que lle falta un fervor... un neno grande caprichoso
con todo o poder como presidente, con maioría no senado e no congreso. Medo
non, terror!!! Sentín dicir que dentro
de catro anos remata o pesadelo... Se o efecto laranxa con todo o poder que vai
acumular non cambia a Constitución e repite indefinidamente esgrimindo a frase
tan manida “por Seguridade Nacional”. O horror.
Comentarios
Publicar un comentario