Bodega Bay: un rapaz de Corme e uns paxaros

 

Fotograma da película "Os paxaros" de Alfred Hitchcock

Un mozo de Corme, na Costa da Morte, agradecido por ter participado como segundo oficial na primeira viaxe de exploración das costas máis setentrionais de California (chegaron ata Alasca), propúxolle ao seu comandante darlle o seu nome a unha baía na que fondearan cando navegaban de regreso a San Blas, México, con parada en Monterrei. Aquel feito sucedeu o 3 de outubro de 1775; o comandante do barco era Bodega e Quadra e o segundo oficial, o mozo de Corme, Francisco Antonio Mourelle da Rúa. Dende entón, e ata hoxe, aquel lugar chámase Baía Bodega, onde hai unha pequena entidade de poboación que vive da pesca do cangrexo real, das ostras e doutras especies coas que lles agasalla o océano Pacífico.

Bodega Bay está a hora e media en coche dende San Francisco, conducindo cara o norte. Esa vila foi escollida por Alfred Hitchcock para rodar a súa afamada película “Os Paxaros”, protagonizada por unha espléndida Tippi Hedren, acompañada por Rod Taylor, Jessica Tandy e Suzanne Pleshette.  A vila non é masivamente turística, mais si acolle numerosos visitantes que queren gozar do espectacular, pero breve, solpor, das praias, da navegación deportiva pola baía, da pesca e, de paso, das ostras e do cangrexo real nalgún dos bares, media ducia mal contada, do porto. Por certo, en 1961 produciuse un ataque auténtico, nocturno, de gaivotas contra os tellados das casas, aparecendo moitas delas mortas cando amenceu, pero foi en Monterrei e nel se inspirou a escritora Daphne du Maurier para escribir unha novela e Hitchcock para facer a súa película.

Quen llo ía dicir, a Bodega e a Mourelle, que 185 anos máis tarde, aquel lugar tan fermoso  ía ser mundialmente coñecido grazas a unha película.