La Aldea Maldita

De cando en vez escoito a Miles Davis, preferentemente nos vinilos que teño do músico de jazz norteamericano. Particularmente, gústame  un disco titulado “Sketches of Spain” publicado por vez primeira en España en 1967. Abre a cara B do disco un tema titulado The Pan Piper sobre o que o especialista Paco Montes, autor da recensión da contraportada do disco, comenta que é unha alborada, unha canción da mañá, sen máis aportación. Certamente, The Pan Piper é unha alborada recollida polo folclorista norteamericano Alan Lomas quen percorreu a península nos anos 1952 e 1953, acompañado pola súa asistente Jeanette Bell, gravando en magnetófono, fotografando e facendo recensións de todo o folclore español ao que puido ter acceso en tan ardua tarefa.

O traballo de Lomax tivo tanta repercusión nas esferas intelectuais e musicais norteamericanas que chegou a oídos do trompetista Miles Davis quen, coa inestimable colaboración do pianista, compositor e arranxador musical canadense Gil Evans, gravou o disco do que estamos falando. Para nós, os galegos, ten unha relevancia enorme que unha figura da historia universal do Jazz escollera a Alborada de Vigo, recollida por Lomax, e a incluíra no seu disco, no que tamén estás as súas versións do Concerto de Aranjuez de Joaquín Rodrigo, o Amor Brujo de Falla e unha impresionante Soleá que conmove a pechar o disco. 

Miles Davis. Jazzaldia Gasteiz ©pemónbouzas

A foto de Miles Davis fíxenlla en 1988 no Festival de Jazz de Vitoria-Gasteiz. Cando tiña un programa musical na radio, nos meus comezos, xa contaba esta historia que aínda  pasa desapercibida entre os seguidores do músico.