Vou falar de fútbol: At.Madrid & Real Madrid

 

Coa que está caendo, vou falar de fútbol. Podería falar dos milleiros de crimes cometidos polo exército israelí dende hai un ano, ou da guerra de Ucraína provocada pola invasión dese país polo exército ruso, ou dos perigos moi probables de que outro energúmeno mentireiro e paleto chamado Donald Trump gañe as eleccións en EEUU, ou da terrible noticia das vitorias fascistas en Italia, Austria, e do seu crecemento en Francia e Alemaña, ou de como un charlatán corrupto acada máis de tres millóns de votos nas eleccións europeas en España, ou do significado de que haxa tanta xente que apoia esta tolemia que so se pode explicar con palabras como ignorancia, populismo, mentiras, corrupción, lacazáns ou malcriados. Ía falar de fútbol.

O domingo 29 de setembro de 2024 xogaron  Atlético de Madrid vs Real Madrid na 8ª xornada de liga. Foi no campo do primeiro. Ese partido xa é coñecido como “o derbi da vergoña”. Un grupo de ultras do Atleti apoiado por toda a masa de ultras dedicouse a tirar obxectos ao campo detrás da portería do Real Madrid. O partido foi suspendido durante 14 minutos polo árbitro.  Ao remate, os xogadores do Atlético de Madrid, lograron empatar no derradeiro minuto, foron celebrar  o non perder o partido, non coa afección que enchía o campo non, foron celebrar ese empate cos ultras que uns minutos antes empezoñaran o evento futbolístico para vergoña de madrileños, de futboleiros e da propia Liga Profesional. Se fora pouco, o adestrador do Atlético, sen xustificar os feitos, falou de evitar provocacións sinalando como culpable ao porteiro rival. Pero aínda hai máis, o comentarista de Dazn referíase aos feitos dicindo “CAEN algunos mecheros y otros objetos”. Terrible. Nada máis que engadir.

Ía falar de fútbol. O aguerrido Atlético de Madrid, adestrado polo aguerrido Diego Pablo Simeone, volveu fracasar ante un mediocre Real Madrid, cantas veces van con este adestrador? O equipo aguerrido xoga como unha banda de covardes frote equipos grandes e, sobre todo, contra o Real. Non se trata de falta de calidade no cadro de xogadores, so é cuestión de covardía na estratexia contra un rival  dese nivel. Simeone saberá de fútbol, será un tipo rochoso, pero convertese nun peluche cando ten o Real Madrid diante.

Outros equipos grandes, Real Madrid ou Barcelona, souberon desfacerse dos seareiros ultras, camadas violentas, fascistas por descerebrados, indesexables nunha sociedade moderna que quere paz e con vontade de medrar. O Atlético de Madrid ten que resolver ese problema. De non facelo, as consecuencias serán desastrosas.