O Endurance no fondo do mar. (Non á guerra. Non á invasión de Ucraína)

O  Endurance e a tripulación atrapados no xeo. Fotos de Frank Hurley

O Endurance  é un barco que descansa no fondo do mar de Weddell no océano Antártico. Trátase dun crebaxeos fretado polo explorador irlandés Ernest Shakleton para “conquistar” o Polo Sur no ano 1914.  O barco quedou apresado e esmagado polo xeo, polo que a tripulación realizou unha viaxe extraordinaria en zorras tiradas por cans coas que se desprazaron polo xeado mar de Weddell ata chegar á illa Elefante.   A expedición o Polo Sur fracasara. Porén, a Expedición Imperial Transantártica, que así se chamaba, pasou á historia das exploracións grazas á pericia do líder Shakleton que foi quen de rescatar con vida a todos os expedicionarios que formaban parte da tripulación, incluído Frank Hurley o fotógrafo da expedición grazas a quen temos documentada a epopea.

Foto da expedición chilena

Estes días, unha expedición chilena a bordo del buque S.A. Agulhas II, das que fan arqueoloxía e exploracións do s.XXI, atopou os restos bastante completos do Endurance a 3000 metros de profundidade e a 7,5 km de deriva do lugar onde o abandonaran os expedicionarios.

Recomendo este libro de Caroline Alexander

A principios do s.XX  poucos lugares do planeta quedaban por “descubrir”; poucos retos para os exploradores que se movían pola épica que empurra a homes e mulleres a asumiren empresas heroicas, dramáticas moitas veces, exitosas outras. Entre eses poucos lugares estaban os dous Polos. A eses anos, a cabalo entre os séculos XIX e XX, foron coñecidos coma a “era polar” polos intentos de numerosos exploradores por seren os primeiros en “conquistar” eses puntos xeográficos tan extremos.