Quen anda aí? (Return to forever)

 

Bonsai Xunípero 1

Aproveito o nome dunha formación musical que iniciou a súa andaina en 1971, liderada por Chic Corea e Stanley Clarke, das pioneiras no jazz fusión, para proporme unha declaración de intencións, de regreso á escrita, á bitácora, na que reflectir opinións sobre o que me importa, e o que me importa xa xurdiu en entradas vellas e ireino debullando  nas sucesivas.

Seguindo coas referencias musicais, este tempo de ausencia non foi voluntario, tivo que ver mais cunha visita ao Hotel California, ese no que habitan os diaños que moitas veces impiden atopar a saída real á rúa, ao mundo. Un mundo, por certo, que moito máis alá da pandemia e do virus que se está a converter en endémico, atopei do revés. Que preguiza! Terei forzas dabondo para enfrontarme a el? A resposta está nos bonsais nos que dende hai décadas me refuxio; se te ergues podes ver moito máis alá, se separas as pólas, hai horizonte, e habéndoo un debe ter en conta  a frase atribuída a Bertold Brecht “hai homes que loitan un día e son bos, hai homes que loitan un ano e son mellores, hai quen loita moitos anos e son moi bos, mais os que loitan toda a vida, eses son os imprescindibles”. Coñezo algúns, afortunadamente. Eu quero ser mellor cada día.

De momento, deixo atrás uns meses de inmersión na poesía como nunca antes tivera feito con tal intensidade. Xela Arias, José Hierro, Antonio Lucas, Gerardo Diego, Rubén Darío, Lord Byron, Wordsworth, Coleridge, Shelley, Keats, J.A. Goytisolo, Antonio Machado, Rimbaud, Luís García Montero e Paul Valery foron os meus compañeiros de viaxe. Un pouco de todo, de distintas épocas, terras, estilos, correntes e... so unha muller entre tanto home, unha galega sublime. Grazas a eles e a moitos outros narradores entre os que están mulleres como Emilia Pardo Bazán,  Chima Achebe, Fred Vargas, Katherin Mansfield e Marilar Aleixandre, son algo mellor. Lembrar aquí algúns dos compañeiros de viaxe so quere provocar ansias por ler en quen ande aí.  

Quen anda aí?

Grazas por estar.