A Estrela de Oriente
Houbo un tempo no que pensei que tiña que axudar aos
nenos e ás nenas que esperaban ansiosos
cada Nadal a chegada dos Reis Magos a coñecer mellor quen de verdade eran as Súas Maxestades. A
tarefa non era doada pero decidín asumir o reto. Non se podía xogar coa ilusión
dos pequenos nunha efeméride que en moitos casos marcaría un antes e un despois
nas súas vidas, coma noutros momentos cruciais nos que o antes e o despois son
fundamentais.
Non me quedaba outra que empezar a investigar. Busquei na
Biblia, no Novo Testamento, busquei nos libros de historia, atopei moito nos
libros de arte onde puiden comprobar como grandes artistas de diferentes épocas
deixaron plasmada, polo menos nunha obra, a “Adoración dos Reis Magos”. Incluso
busquei en bibliotecas relixiosas e so unha persoa conseguiu aportarme algo máis de luz, Sor Mónica, unha
muller que soubo dar cariño á miña filla Eri nos seus primeiros anos de
escolarización.
De socate, souben que tiña que empezar a escribir. Que a
historia dos Reis Magos tiña que ser tan
ilusionante, cos datos que posuía nas mans, como a verdadeira ilusión coa que
os pequenos esperan a súa chegada cada Nadal a noite do 5 de Xaneiro de cada
ano.
Tiña claro que nesta historia debían agromar valores
fundamentais na formación das persoas, valores como a solidariedade, como a
relación entre culturas, o respecto mutuo á marxe de crenzas ou dar cor da pel, a educación, a
paz, … todo aquilo que serve para que as sociedades sexan máis libres, máis
abertas, máis democráticas. E o mito infantil por excelencia na cultura occidental,
pensei, podería e pode servir para
conseguilo.
De socate, digo, apareceu unha estrela no firmamento,
unha estrela anunciada por sabios, profetas, lendas e tradición oral. De tal
xeito que en tres lugares afastados do planeta tres elixidos comezaron a
aventura. Unha aventura que dous mil anos máis tarde aínda continúa vixente.
Cada ano, no mes de decembro aquela estrela, a Estrela de Oriente, volve a
refulxir no firmamento e millóns de nenas e nenos agardan que se deteña nas
súas casas para facer posible o milagre, converter a ilusión
nun abraiante sorriso de felicidade.
Os máis pequenos van coñecer a historia e os que xa
medraron dabondo, os que xa están na fase do “despois”, van comprender a
mensaxe.
A Estrela de Oriente conta unha historia dos Reis Magos. Unha historia na que creeu dende o principio o director de Xerais, Manuel Bragado. O meu texto goza ademais do valor engadido que supoñen as ilustracións dun home
chamado Marcos Calo Bermúdez ao que aínda non coñezo persoalmente pero que co seu traballo reflicte toda a maxia que eu
pretendín transmitir no meu relato.
Dende outubro de 2012 está nas mellores librerías,
editada por Edicións Xerais de Galicia.
QUE GANAS DE TE-LA NAS MIÑAS MANS E PODER SUMERXIRME NESTA HISTORIA.
ResponderEliminarSABES QUE TE DESEXO TODA A SORTE DO MUNDO.
BICOS
Moitas grazas, anónima Yolanda. Bicos.
Eliminar