Volvendo ás vellas lecturas

Houbo unha vez un xornalista que, interesado polas miñas lecturas, me preguntou que libro estaba lendo. Foi hai tantos anos que non lembro de que libro lle falei, o que si lembro é que se trataba da relectura dalgún clásico, porque a súa resposta a teño gravada no subconsciente con tal forza que se converteu en idea recorrente cada vez que tiña entre mans un libro xa lido anteriormente. O xornalista díxome que non perdera o tempo con relecturas, que había moito libro bo por ler e na vida non había suficientes horas para todo. Seica, a pesares da recorrencia, non lle debo facer moto caso á recomendación xa que é raro o ano no que non recunco nalgunha historia xa lida, nalgún poema xa soñado.

O caso é que este inverno non está sendo diferente a outros, por iso volvín a percorrer as rúas de Ourense da man dos personaxes de A Esmorga, a magnífica novela do gran Eduardo Blanco Amor, indo de troula en troula, de continua esmorga, camiñando sempre polo fío da navalla. Evocando unha terra querida como é Celanova, sentín a forza das palabras empregadas como denuncia social, como espoleta de conciencias fronte á inxustiza, que Celso Emilio Ferreiro soubo escribir con mestría e enorme calidade literaria na Longa noite de pedra.

Pero o mar sempre me recupera para as ribeiras, e si son da ría de Arousa con moita más forza. Co que non quedaba outra que volver a ler “De catro a catro”, libro no que o poeta das vangardas galegas, Manuel Antonio, evoca con tanta forza a súa paixón polo mar. Por certo, estes días cúmprense 80 anos do pasamento do poeta rianxeiro polo que é lembrado en moitos foros, sen embargo, recomendo o artigo publicado no xornal El País por Suso de Toro. http://www.elpais.com/articulo/Galicia/lenda/Manoel/Antonio/Perez/Sanchez/elpepiautgal/
E este escritor contemporáneo foi o que me levou, outra vez, polas pequenas historias que conforman un gran libro “Polaroid”.

En fin! Cada un ten as súas querenzas. Se somos quen de ver repetidas veces a mesma película, non vexo problema en facer o mesmo cos libros que consideramos importantes.