Isabel Allende

 

Conversando con Isabel Allende, con José Creuheras como testemuña. Barcelona, 16/10/2026

A boa noticia de Isabel Allende gañando a 75 edición do Premio Planeta de Novela foi celebrada por moitísimos lectores da súa obra e pola gran maioría da crítica. Había certo andar en falas de que podería ser a gañadora desta edición, tamén saíra o seu nome na edición anterior, na do ano 2025, pero cando cobrou forza durante o día 15 de outubro, antes da gala de entrega do premio, os que non estabamos convencidos do regreso á calidade literaria do premio, tivemos que recoñecer que Planeta fixo o esforzo  millonario necesario para dar lustre á 75 edición do premio e, de paso, recobrar o prestixio perdido nos derradeiros anos.

“La hora antes del alba” é o título da obra coa que Isabel Allende gañou esta edición do Planeta. Boa parte da prensa e a editorial non se cansan en vendela como a continuación de “La casa de los espíritus”, algo que ela mesma desmentiu na rolda de prensa inmediatamente posterior á entrega do premio, e tamén na celebrada ás once da mañá do día seguinte. Si que é un episodio posterior e, polo tanto, moi atractivo para os lectores de “La casa de los espíritus” ou de “Eva luna”.

Con oitenta e catro anos de idade, Isabel Allende  afirmou que nunca se postulara a ningún premio por medo a non gañalo, pero que nesta ocasión, presentándose con pseudónimo, non tivo incumbinte en facelo, e gañalo significou para ela un recoñecemento internacional como o de gañar o Nobel. Iso dixo.

En todo momento, a escritora chilena residente en California, alertou dos tempos convulsos que vivimos e dos perigos do fascismo que anda axexando por todas partes. Algo no que tamén insistiu o finalista, Sergio Hernández, quen coa súa obra “La añoranza” lembra os momentos do exilio de Antonio Machado.

Isabel Allende foi incriblemente agradable e cariñosa con todo o mundo durante a súa estadía en Barcelona, incluso fixo chanza de que quizais aínda se casara por cuarta vez, estando o seu terceiro marido diante.

Por fin, as novelas gañadora e finalista do 75 Premio Planeta xeran interese e crean grandes expectativas entre os lectores.