 |
| Vista das torres da Catedral de Santiago dende os tellados |
Antes de viaxar a Santiago de Compostela, será
mellor ir pensando no cambio de hora que vai ter lugar a madrugada do sábado 24
de outubro ao domingo 25 deste ano 2026. Xa sei que nos medios de comunicación
levamos varias décadas falando da inutilidade do cambio de hora, algo que so
provoca trastornos nos cidadáns e ningunha vantaxe evidente, nin social nin
económica. No ano 2019, xusto antes da pandemia que semella ter sucedido hai
centos de anos, o Parlamento Europeo decidiu apoiar a eliminación do cambio de
hora bianual tras realizar unha consulta pública en todos os países membros.
Mais, outra vez os políticos, os representantes de cada país non foron quen de
poñerse de acordo en cal dos horarios se debería implantar, o de verán ou o de
inverno. E con esa leria estamos, coa da incapacidade dos representantes dos
países para poñerse de acordo; mentres tanto, todos sufrindo este acoso na
primavera e no outono.
Avisados do cambio de hora, visitamos
Compostela, a súa catedral, o punto de interese más importante de Galicia se
atendemos aos visitantes que ten. Na catedral de Santiago de Compostela entran
ao ano preto de dous millóns e medio de visitantes, o que supón unha media de
sete mil persoas diarias (no verán son uns doce mil e no inverno arredor de
cinco mil), co que duplica calquera outro punto de interese galego como a Praia
das Catedrais, as Illas Cíes ou a Muralla de Lugo. Isto son datos, so son datos
que non menoscaban a importancia dos demais puntos de interese galego. Mais os
datos implican ser previsor para organizar a visita ao templo catedralicio, a
visita ao museo da catedral, aos tellados, co fin de facer a menor cola
posible, perdendo un tempo que poderíamos empregar en ver outras marabillas da
cidade do Apóstolo. Tamén hai que ter en conta os horarios de restaurantes e
tabernas nas que a masiva presencia de anglosaxóns, franceses e alemáns, a parte
de orientais, modificaron as horas de xantar e de cear co que, ás doce do medio
día ou ás cinco da tarde xa hai moitas mesas ocupadas para unha cousa ou para a
outra. Convén lembrar aquí que a restauración estase a recuperar cunha manchea
de restaurantes que, tendo turistas entre os seus clientes, ofrecen calidade
nas súas cartas nas que impera o produto galego. Tamén os hai nos que a
clientela é máis local, e aí rozan os niveis doutras épocas, nas que primaba o
produto elaborado de forma simple pero en pratos abondosos. Hai moito que ver
en Compostela, e o outono segue a ser unha boa época para visitala, porque ademais
do imprescindible, catedral, rúas da zona monumental, varias igrexas que son
verdadeiras xoias... as actividades máis lúdicas convidan por si mesmas a
visitar a capital de Galicia, falo de concertos en varias salas habilitadas e
do cine no festival Cineuropa.
Por outra banda, convidaría aos visitantes a
que pensaran en libros sobre Santiago, non guías, senón novelas ou pequenos
ensaios. Penso en Valle Inclán, en Torrente Ballester, o propio Paulo Coehlo...
O turismo literario estase a converter nun atractivo mais que está a mover
xente polo mundo.
Comentarios
Publicar un comentario