Renegados

 

Renegados do ICE, o xeo mata!

Os periféricos son unha etnia que malamente sobrevive nos seus territorios, cada un cos seus líderes, por diversos motivos: son gobernados por tiranos conservadores, por tiranos liberadores ou por presidentes electos en estados fallados; non recibiron formación, a súa educación é escasa e son fieis, radicais diría eu, seguidores dunha relixión monoteísta tamén errada, dividida en múltiples setas quita cartos, como a orixinal. Todos quedan abraiados polo brillo dourado e hortera dunha torre na capital do mundo.

Os periféricos acoden en masa, maioritariamente de xeito ilegal á chamada da selva, do dourado e do odio disfrazado de liberdade. Uns entran e conseguen traballos, mellores ou peores (case sempre) e, cando o efecto laranxa se expande, unha manchea deses periféricos asegura o seu caldo acadando poder, poder para matar, poder para insultar, poder para reprimir absolutamente autoconvencidos da mentira na que viven. E matan, e menten.

A quen matan? A quen menten? Aos seus, aos demais periféricos que apareceron nunha listaxe, aos demais periféricos que viven relativamente ben un tanto alleos a tanta mentira, a tanto odio, a tanto efecto laranxa. E matan, matan reprimen os seus. Verdade Jonathan Ross? Verdade Jesús Ochoa e Raymundo Gutiérrez? Verdade Bovino?

Pero ollo! Ochoa e Gutiérrez, matastes un enfermeiro de raza branca oficial, quizais o señor laranxa diga que foi un erro, para calmar os seus votantes, e sexades condenados por asasinato. Quen sabe!

Os periféricos deberían lembrar que non é ouro todo o que brilla.

Aviso a navegantes. Aviso a renegados.