A novela de Graham
Green O factor humano ven moi acaída nestes tempos de
tribulacións. Sen grandes heroes, con personaxes normais que forman parte da gran maquinaria (sociedade)
desempeñando cadanseu papel, definindo perfís psicolóxicos nos que inciden con
forza lealdades, amor, dúbidas, amoralidade, paranoias, segredos... e unha
presión do acontecer internacional, guerra fría na súa máxima expresión, que
marca notoriamente as persoas normais, os cidadáns, como meros peóns no taboleiro
das intrigas entre bloques, daquela a Unión Soviética e os Estados Unidos
de América. A película de Otto Preminger é magnífica, pero a novela
é fundamental.
Empezou 2026 coa
confirmación de que o taboleiro no que o mundo xogaba a partida, para a que
había regras que pretendían evitar a apocalipse, saltou polos aires. O abusón
laranxa escachouno dunha puñada mentres o pseudoJamesBond ruso
aplaude, porque lle beneficia e China, as caladiñas, segue ampliando o
seu grao de influencia planetario. Eliminado o problema de Venezuela
secuestrando ilegalmente o ditador que chegara ao poder polas urnas, igual que
o secuestrador, o abusón quere Grenlandia polas boas ou polas malas, en
aras da “Seguridade Nacional”. Europa enteira debería enviar tropas á
illa verde (verde so no sur) en atención á Seguridade Nacional Europea, a ver
se os líderes espilen dunha vez; a moitos nos gustaría ver a cara do abusón
cando alguén lle responde coas súas mesmas armas, porque comportamentos patéticos,
humillantes, de lambecús, de lacaios, xa sabemos que non dan resultado, verdade
María Corina Machado? Canta vergoña debe sentir a xente demócrata de Venezuela.
E en España?, cunha dereita como un barco á deriva ocupada en pregarias para que o abusón non
invada Grenlandia, feito que a descolocaría totalmente, sen saber cales terían
que ser as súas fidelidades mentres un foguete chamado ultradereita lles adianta
sen problema.
Nestes tempos en
que os abusóns nos ameazan, quizais debamos ter máis claras as lealdades,
quizais deberíamos pensar máis na familia, os amigos e a
contorna, o factor humano.
Comentarios
Publicar un comentario