Ter estrela... e deixar pegada

Grabando, hai uns anos, diante do Teatro Chinés, Hollywood Boulevard, Los Ángeles

Se ter mundo é importante, enriquecedor, ter estrela pode ser sinónimo de éxito. Do mesmo xeito que ter estado en moitos lugares, para facer un selfie, non significa ter mundo, ter un éxito non significa ter estrela. 

Mais alá do apaixonante mundo da astronomía, se hai un lugar no planeta relacionado coas estrelas, coas persoas, homes e mulleres, con estrela, ese é, sen dúbida, Hollywood Boulevard, a arteria mais cinematográfica do mundo situada en Los Ángeles, California. 

Dende os inicios do cine mudo e do star system, esa rúa é testemuña, e memoria ao mesmo tempo, da existencia de figuras míticas do celuloide que teñen a súa estrela nalgún punto das dúas beirarrúas da gran avenida, do chamado Paseo da fama. 

Estiven varias veces alí e busquei estrelas que me interesaban, non por mitómano senón por verdadeiro recoñecemento. Tamén fotografei as pegadas de mans e pes dalgúns dos mais rutilantes, os que están fronte o Teatro Chinés, lugar de premieres con alfombra vermella. O éxito e a repercusión mundial de ter estrela en Hollywood Boulevard foi tan notorio que non tardaron en aparecer estrelas cun gramófono ou cun micrófono para recoñecer cantantes e músicos, humoristas... 

Agora Javier Bardem, un dos poucos actores españois en ter estrela, a súa dona Penélope Cruz tamén a ten, ben de ser recoñecido co dereito a deixar pegada, si, de mans e pes, ademais da sinatura, todo sobre unha baldosa de cemento fresco; mérito que so lle foi recoñecido a 200 persoas na historia do cine, pensemos que hai 2800 estrelas en todo o bulevar.

Certamente é unha gozada pasear por Hollywood Boulevard descubrindo estrelas de xente que admiramos. Na segunda visita que fixen a esa rúa cadrou coa morte de Anthony Quinn e foi doado detectar a súa estrela con tanta vela acesa e con tantas flores, nunha homenaxe espontánea dos seus admiradores e dos afeccionados ao cine.

Entre os actores españois con estrela están Toni Moreno, un dos grandes galáns do cine mudo, Antonio Banderas e os xa mencionados Penélope Cruz e Javier Bardem; pero hai músicos como Xavier Cugat, que ten catro, José Iturbi, Julio Iglesias, Plácido Domingo e Alejandro Sanz. Boto en falta a Fernando Rey, pero o mundo é así.

Tampouco ten estrela outra cantante de éxitos mundiais como Bonnie Tyler, que nestes momentos está pasando por unha situación crítica tras saír dun coma inducido. Unha muller con moitos vínculos con Galicia onde actúa con moita frecuencia, incluso en festas privadas; unha muller que pasou por varios programas de televisión que eu presentaba e coa que compartín unha pinta de cervexa en Carnabie Street, no corazón do Soho londiniense, cando eu paseaba por aquel barrio lendario e ela me recoñeceu por estar unhas semanas antes na tele comigo.

Estrelas son quen deixa pegada, e deixan pegada aqueles que dalgún xeito nos emocionaron no mundo das artes, das letras, das ciencias, incluso da prensa, radio e televisión.