DEMOCRACIA = RESPECTO

 

Segundo o dicionario, para a palabra DEMOCRACIA hai varias acepcións:1.Forma de goberno na que o pobo exerce a soberanía. 2.Doutrina política que exerce ese sistema de goberno. 3. País gobernado dese xeito. 4.Sistema político baseado no recoñecemento da decisión da maioría a través das eleccións.

Para Michael J.Sodaro, politólogo da Universidade George Washington, a DEMOCRACIA ten catro propósitos claros: 1. Mellorar a calidade de vida e a dignidade do individuo. 2. Ter voz e voto nas decisións dos gobernos. 3. Limitar o poder dos cargos públicos. 4. Intentar reducir os antagonismos sociais. (Expresado todo de xeito moi reducido, a modo de titulares).

Se facemos unha enquisa sobre o significado de DEMOCRACIA, a maioría respondería coa palabra LIBERDADE.  E, efectivamente, a liberdade é un dos froitos da democracia. Porén, se repasamos o significado da palabra no dicionario e os propósitos do prestixioso politólogo, o maior sinónimo da palabra DEMOCRACIA é a palabra RESPECTO.

RESPECTO implica escoitar e recoñecer, aínda que non se compartan, as ideas e as diferenzas dos demais.

Mais o RESPECTO non é algo gratuíto, é algo que implica sobre todo educación e, de paso, formación. Pero todos coñecemos, ou coñecemos no pasado, persoas maiores que tiveron pouco acceso á formación pero que recibiron unha educación moral nas súas casas de primeira orde.

Nas sociedades democráticas en crise, un dos elementos paradigmáticos desa crise é a falta de respecto. Esa falta de respecto en España é a bandeira enarborada como único argumento político pola oposición. A desgraza e o gran problema non é que sexa a bandeira da ultradereita, inimiga por definición da democracia, senón a autodestrutiva liña seguida pola dereita que perdeu o norte, esquecendo o significado da palabra e perdendo o compás doutras dereitas europeas e peninsulares claramente democráticas.

Non so hai que ter Sentidiño. Hai que ter RESPECTO.