 |
| Togado no Portico do Foro de Emérita Augusta |
Miramos para outro lado mentres dous países “abusóns”
están cometendo un xenocidio, unha limpeza étnica para construír un resort
no que so é o principio do “Gran Israel” sionista, unha versión da “Gran
América” da doutrina Monroe que o señor laranxa pretende tamén poñer en marcha.
Miramos de esguello mentres os dous países “abusóns” atacan Irán, secuestran o
presidente de Venezuela, ameazan a Cuba... Cando vexas os teus veciños a barba
cortar, pon a túa a remollo.
Entrementres, maniféstase a estupidez humana.
Un Borbón pide desculpas coa boca pequena
polos posibles abusos de hai cincocentos anos canda a conquista de México,
lembremos que todo empezou cun tipo chamado Hernán Cortés acompañado por
corenta homes, si corenta, non corenta mil, que acabou co imperio Azteca. Entre
tanto, hoxe en día, a clase media mexicana, e de aí para arriba, teñen
traballando ao seu servizo nas súas vivendas e fincas, cociñeiras, limpadoras, xardineiros,
cultivadores... poñamos arredor de dez ou doce persoas, nativas, cobrando entre
todos menos do que cobraría un branco cun salario mediocre, sen seguro, sen
contrato, sen seguridade social, podendo ser despedidos por capricho... Son eses
brancos, criollos, os que esixen que España pida perdón polos abusos de
cando a conquista de México, que fixeron os seus tataravós.
Na miña segunda visita, das varias que fixen a
ese tan espectacular como insán, perigoso e violento país no que a propia
policía está conchabada cos delincuentes para timar os forasteiros,
cando unha persoa branca, mexicana, me dixo que os españois tiñan que devolver
o roubado a México, a miña resposta foi que ningún antepasado meu estivera en ningunha
conquista de América, que mirara para atrás na súa árbore xenealóxica, que aí
seguro ía haber conquistadores. Os seus apelidos delatan a eses netos e bisnetos
de conquistadores que hoxe explotan ao auténtico pobo mexicano, o que xa estaba
alí antes da chegada de Cortés e os seus corenta ladróns.
Mentres, agardo que os italianos pidan perdón
polos abusos dos romanos cando conquistaron Hispania, e que devolvan o
ouro que levaron de Galiza e O Bierzo.
Comentarios
Publicar un comentario