Premios literarios

 

Compostela, con Eduardo Mendoza e Xurxo Fernández

Como cada ano por estas datas, a xente da cultura e os lectores estamos, en maior ou menor medida, pendentes de dous premios literarios e da entrega doutro. Eduardo Mendoza, o gran escritor catalán que xa gañara o Planeta, recollerá a finais de mes o Premio Princesa de Asturias das Letras. Antes, coñecemos o Premio Nobel de Literatura que se fallou o xoves 9 de outubro e que este ano, a pesar das quinielas e das casas de apostas, gañou o escritor húngaro László Krasznahorkai de quen sentira falar pero non lin e, en nada, vaise fallar o máis importante premio da industria editorial en castelán, o Premio Planeta que vai xa pola 74 edición.

Hai outros premios que dan prestixio, uns serven para que o autor venda máis libros e outros para colocar os autores, homes e mulleres que se esforzan na súas paixóns narrativas, na lista dos que pagan a pena ler.

Teño lido varios libros de Mendoza, prometo ler a László Krasznahorkai e xa veremos que pasa cos gañadores do Planeta. Todos eles poden ser considerados autores de éxito, non xa pola súa calidade literaria, tamén polo feito de térense convertido e best-sellers, por venderen moitos libros grazas ao seu talento e a saberen chegar ao gran público.

Os lectores saben, por iso leen, que hai unha diferenza grande entre literatura e libros de consumo. Algúns grandes autores escribiron libros que a crítica, e os lectores, cualificarían de menores, do montón, e coñecemos escritores da industria editorial que pouco a pouco foron atopando a súa voz e acabaron escribindo obras  de moito calado.

O importante é que o talento sega agromando e que os lectores gocemos dos libros que escollemos ler.