 |
| Samaín |
A tradición celta sitúa o fin de ano no 31 de outubro baseándose
no que, supostamente, era un ano natural que remataba cando todas as colleitas
estaban xa na casa, a última a de castañas. O día 1 de novembro do noso
calendario, celebración católica de Todos os Santos, representaba para
os celtas o Aninovo. Todas as tradicións van sufrindo pequenas evolucións
co paso dos séculos, con isto quero dicir que Samaín son varios días de
celebración, ao igual que Defuntos, que os magostos, que a apertura da pita para probar o viño novo.
Para moita xente, Samaín quere representar
unha alternativa ancestral ao Halloween que, dende os Estado Unidos
de América, chegou a Europa como novidade e como festa comercial desvirtuado,
como todo, polo cinema hollywodense. O Halloween é unha adulteración do Samaín
ou Samhain, palabra de raíz gaélica que define o final do verán e o comezo do
inverno. A celebración orixinal foi
levada aos EEUU polos emigrantes irlandeses e con ela, algúns rituais
que a debullan.
O Trick or treat (doce ou
trasnada), era a petición de rapaces e mozos polas portas das casas co fin
de obter castañas ou algún doce para facer o magosto. A presenza do lume quedou
limitada ao tizón que se metía nalgúns tubérculos aos que se lles extraía o interior e se lle
abrían ollos, nariz e boca, buratos polos que saía a luz , iluminando como un facho
con cara; os tubérculos máis usados eran os nabos e as cabazas. Pero o
lume tiña moita máis presenza en tempos pasados, xa que se facían luminarias ou
cacharelas nas portas das casas, nas prazas e outros lugares comúns coa intención de quentar
a noite como preparación para o inverno. O lume das fogueiras e do fogar,
dentro das casas, permanecía aceso toda a noite pois a tradición conta que, nestas
xornadas, os mortos regresaban para convivir cos vivos nos espazos que antes
ocuparan eles. O Samaín ou Samhain, ou
celebración de Todos os Santos (All Hallow’s even) derivou en Halloween, e aquí
está, convivindo co Samaín. Ventureiro Ano Novo celta!!!
Comentarios
Publicar un comentario