Apoloxía da ignorancia

 

Os libros e a lectura son riqueza

Foi Andy Warhol quen dixo en certa ocasión que “no futuro, todo o mundo terá 15 minutos de fama”. Que acertado estaba! A estas alturas do séc. XXI, as redes sociais son o maior escaparate da historia da humanidade, no que, lonxe de servir para mellorar a vida e de ser altofalante da educación, da cultura, da ciencia, da información contrastada e de todo aquilo que mellora a vida dos seres humanos, serve como propagador de estridencias, banalidades, mentiras, odio e tantas e tantas outras cousas, que so poñen en valor a ignorancia como dereito vital (nun futuro case inmediato todo o mundo será ignorante).

Hai xente que afirma, cheo de razón, que non cree nas vacinas (entre eles un Kennedy responsable da sanidade no Goberno de Trump). As vacinas, a ciencia, non son cuestión de fe. Un pode crer ou non nun deus, no destino... pero no relativo á ciencia, ás vacinas, á estrutura do planeta terra, non hai crenza que valga; simplemente ou estás cos adiantos científicos e co resultado das investigacións ou te retratas como un completo ignorante.

Podes dicir que non tes o hábito de ler, que nunca te inculcaron a lectura na túa formación nin na túa educación, e de aí concluír que non che gusta ler. Es mellor ou peor? Sen dúbida peor cos que leen, cos que lemos. Se non les non tes porque ser mala persoa, en absoluto; so es unha persoa con carencias. Estar orgulloso de non ler so retrata a túa propia ignorancia.

Os libros son riqueza, a ciencia é riqueza. Grazas a uns e a outra, o ser humano avanzou. O problema foi que, nalgún momento de décadas recentes, abandonamos os fillos porque priorizamos a nosa comodidade, e o que conseguimos son novas xeracións de ignorantes, maleducados, uns fráxiles mental e fisicamente e outros macarras brabucóns, aínda máis ignorantes.

Pon libros na túa vida... porque senón, so che queda cantar me gusta la fruta, a canción do verán dos imbéciles e escuros.