"Downtown" e o maletín máxico

 

O centro da cidade pode facer feliz. Iso é o que suxire a canción.

Era moi neno cando o meu pai entrou na casa cun pequeno maletín máxico. Resultou ser un tocadiscos  da marca Conver, fabricado en Granollers, que viña co agasallo dun Long Play de grandes éxitos de aqueles anos, uns en inglés, creo lembrar que tamén había cancións en francés e en castelán; unha delas, era o éxito mundial “Downtown” cantado pola inglesa Petula Clark, no que un tal Jimmy Page, futuro fundador de Led Zeppelin, tocaba unha guitarra case imperceptible.

Se daquela xogaba a ler noticias dos xornais detrás dun cartón recortado que facía as veces de televisor, aquel maletín tocadiscos fixo agromar en min poñer música e adorar a radio. Xa o dicía o sempre lembrado Rudyard Kipling, a infancia volve, cremos que volve, pero sempre está aí.

Aquel maletín Conver consumiu electricidade e moitas agullas, de tanto que se desgastaban, sobre todo nos veráns en Palmeira, co volume a todo trapo xa que non se molestaba os veciños.

Daquela non podía imaxinar que, moitos anos máis tarde, poría aquelas cancións na emisora de radio na que traballaría ou que coñecería e falaría con moitos daqueles artistas, como foi o caso da propia Petula Clark, unha artista grande, respectuosa, elegante e sumamente profesional; un encanto de muller comigo cando actuou nun dos programas que presentei na TVG.