.jpeg) |
| A Frouxeira (fragmento con ovos voandeiros) de J. Méndez |
A primeira hora da tarde, nun verán de hai
moitos anos, e acompañado por unha ducia de amigos, topamos cun grupo de xubilados
do mar que miraban o ceo cuns prismáticos. Foron tan xenerosos que
nos pasaron os prismáticos para que nós tamén foramos testemuñas; ao final
eramos preto de cen persoas con media ducia de binoculares para ver mellor o
que xa se vía a simple vista. Flotaba quedo no aire un obxecto con brillo metálico
e con forma de ovo, do que acabou desprendéndose a metade inferior que,
á vez, se dividiu en tres partes, cada unha delas marchando nunha dirección
diferente. A metade superior do ovo foise cara arriba pasados uns dez ou quince
minutos.
Ese avistamento dun obxecto voador non
identificado (OVNI) que eu observei dende a Pobra do Caramiñal,
foi seguido por milleiros de persoas en Portugal e media España ata Zahara
de los Atunes, na provincia de Cádiz. Moitos anos despois, nesa localidade gaditana,
confirmoumo J.J. Benítez, escritor de éxito mundial e investigador do
fenómeno OVNI, dicíndome que tiña moita documentación gráfica e xornalística
sobre aquel feito.
Non é o mesmo ver un OVNI que confirmar a
existencia de vida extraterrestre. Podemos ver un OVNI, como no meu caso,
sendo simplemente iso, un obxecto estraño voador. Como dixen onte, son
pragmático, e non coñezo información científica que acredite a existencia de
vida extraterrestre. Ollo! Ninguén nega esa posibilidade, mais de momento non
hai evidencias científicas que a acrediten.
Recomendo un libro, fácil de ler e marabilloso,
titulado Astrofísica e editado pola Universidade de Vigo.
A súa autora Ana Ulla Miguel, é catedrática de Astrofísica da
Universidade de Vigo, científica brillante e defensora das mulleres na historia
da Astronomía e a Astrofísica fala, no derradeiro capítulo, sobre a busca de
vida no Sistema Solar e fora do Sistema Solar. Está tan ben escrito, que
eu, un perfecto ignorante nestas e en tantas outras cuestións, lino sen esforzo
e aprendín a entender un pouquiño o Universo. Todo grazas a Ana.
Ilustro esta entrada cun fragmento do cadro A
Frouxeira de J. Méndez no que non faltan os seus ovos
voandeiros.
Comentarios
Publicar un comentario